ليه الجيش ???

الثورة لن تنجح إلا بعد وصولها للحكم


آن الاوان ترحلي يا دولة العواجيز

عواجيز شداد مسعورين أكلو بلادنا أكل

و يشبهوا بعض نهم و خسة و شكل


من زمان وأنا بقول إن طنطاوي لازم يمشي ... كتبت الكلام دة على فيسبوك من قبل ما حكومة شفيق تقع بس تقول لمين ؟ الناس في مصر طيبة وخايفة على البلد لو حصل صدام مع المجلس العسكري... ماشي الكلام بس المشكلة إنه أداء المجلس العسكري يثير الشكوك ... المجلس العسكري اعضاؤه مبدئياً، كلهم، مبارك هو اللي عينهم في الاماكن اللي هما فيها والله أعلم بنواياهم...بس شكلها مش تمام... حد يقوللي ومين يمسك الحكم ؟ أقوله ماشي المجلس العسكري لحد الانتخابات بس يحترم الثورة والثوار، هما اللي المفروض لهم الكلمة العليا الآن.


للحق أنا سمعت إن طنطاوي رفض أمر من مبارك بضرب الثوار في التحرير ومن هنا الناس احترمت الجيش اللي هو أصلاً من الناس... الجيش مش هو المجلس العسكري بس... الجيش أكبر من كدة، بس الشعب أكبر من الجيش، وهو مصدر الشرعية الأوحد.


ليه بقى الجيش مش بيحقق في أحداث 9 ابريل ؟ ليه مش بيحقق وعود إعادة محاكمة من حوكموا عسكرياً في إنتهاك صارخ لأبسط حقوق الانسان ؟


ليه الجيش سايب حسني مبارك في شرم الشيخ ؟


ليه الجيش لسة بيقبض على الناس و يمثلوا أمام النيابة العسكرية ؟


إيه سر منع شرف من تغيير وزراء ؟ ليه رفض المشير إستقالة يحيى الجمال ؟


الشعب يريد إسقاط النظام